Diyaaradaha dagaalka ee F-16 ee Turkiga ayaa Soomaaliya lagu soo geliyey horraantii sannadkan, iyadoo Ankara ay sheegtay in joogitaankeeda milatari uu qayb ka yahay iskaashiga amni ee kala dhexeeya Dowladda Federaalka Soomaaliya iyo la-dagaallanka kooxaha argagixisada.
Si kastaba, doorka sii kordhaya ee Turkiga ee dhinaca amniga Soomaaliya ayaa xilligan soo jiidanaya indhaha, gaar ahaan iyadoo dalka ay ka jiraan xiisado siyaasadeed iyo amni oo ka taagan meelo kala duwan.
Maalmihii u dambeeyey, waxaa la soo sheegay dhaqdhaqaaqyo aan caadi ahayn oo dhinaca cirka ah, kuwaas oo laga arkay deegaano ku dhow Muqdisho iyo aagag ay ciidamada dowladda federaalku hore uga hawlgaleen.
Sidoo kale, xaaladda amni ee Baydhabo ayaa ah mid si gaar ah isha loogu hayo.
Wararka hadda soo baxaya ayaa sheegaya in saddex diyaaradood oo F-16 ah ay isku mar hawada u kaceen saaka, iyadoo lagu sheegay inay wadaan hawlgal roondo iyo ilaalin ah oo ku wajahan aagagga u dhexeeya Baydhabo iyo furimaha Shabeellaha Hoose, gaar ahaan meelaha loo yaqaan “Qaansada Muqdisho” iyo difaacyada ku dhow caasimadda.
Watar Media waxay xustay in xogta ku saabsan hawlgalka saaka iyo jihada saxda ah ee diyaaradaha ay weli u baahan tahay xaqiijin rasmi ah oo ka soo baxda Dowladda Soomaaliya ama Dowladda Turkiga.
Waxaa hore loo xaqiijiyey in saddex F-16 oo Turkish ah ay Soomaaliya ka howlgalaan, waxaana 2026 si rasmi ah loo arkay iyagoo ka qayb qaadanaya munaasabad ciidan oo Muqdisho ka dhacday. Sidoo kale, Wasaaradda Gaashaandhigga Soomaaliya ayaa horay u sheegtay in F-16-yada Turkiga loo adeegsaday weerarro ka dhan ah Al-Shabaab ee Shabeellaha Hoose.
WATAR MEDIA | XOGTA IYO XAQIIQDA
